Aadhaar Card: ఆధార్ కార్డు అనేది భారతీయులకు ఎంత ముఖ్యమైన డాక్యుమెంటో ప్రత్యేకంగా చెప్పనక్కర్లేదు. అన్నింటికీ గుర్తింపుకార్డుగా ఇది పనిచేస్తుంది. ప్రభుత్వ ప్రయోజనాలు పొందాలన్నా కూడా ఆధార్ కార్డు తప్పనిసరి. అయితే ఆధార్ కార్డుకు సంబంధించి కేంద్ర ప్రభుత్వం కొత్త నిబంధనలు విధిస్తోంది.
Aadhaar Card: భారత పౌరులందరికీ ఆధార్ కార్డు అనేది తప్పనిసరి. ఇప్పుడు దీనికి సంబంధించి కొత్త నిబంధనలు విధిస్తోంది కేంద్ర ప్రభుత్వం. కొత్తగా జారీ అయిన మార్గదర్శకాల ప్రకారం.. తప్పనిసరిగా ఆధారాలు సమర్పించాల్సి ఉంటుంది. ప్రతి భారత పౌరుడికి ఆధార్ కార్డు ఉండాలనే నిబంధనను కేంద్ర, రాష్ట్ర ప్రభుత్వాలు విధించాయి. ఇక పలు సంక్షేమ పథకాల మంజూరు, భూముల రిజిస్ట్రేషన్, ఉపాధి హామీ పనుల కల్పన, బ్యాంక్ పాస్‌బుక్, భూముల క్రయవిక్రయాలు, విద్యార్థుల చదువులు, పంటల విక్రయాలు, స్కాలర్ షిప్స్ వంటివాటికి కూడా ఆధార్ తప్పనిసరిగా మారింది. అయితే వీటిల్లో సవరణలు చేసుకునే విధానం గతంలో చాలా సులభంగా ఉండేది. ఇప్పుడు మాత్రం అది కాస్త క్లిష్టంగా మారిపోయింది.
ఈ క్రమంలో పెద్ద ఎత్తున జరుగుతున్న మోసాలు అరికట్టేందుకు కేంద్ర ప్రభుత్వం చర్యలు చేపట్టింది. డాక్యుమెంట్లు, వయసు బట్టి కేటగిరీల వారీగా సమర్పించే పత్రాల్లో మార్పులు చేస్తూ నిర్ణయం తీసుకుంది UIDAI. సవరణలో సరికొత్తగా మార్పులు చేస్తూ.. దరఖాస్తు విధానాన్ని మొత్తంగా మార్చేసింది.
మొత్తం 3 కేటగిరీలుగా..
ఆధార్ కార్డు సవరణ చేసుకునే వారిని వయసుల వారీగా మొత్తం 3 కేటగిరీలుగా విభజించారు. అంతకుముందు ఈ విభజన ఉండేది కాదు. రెండు రకాల దరఖాస్తు పత్రాలుండేవి. తాజాగా ఐదేళ్లలోపు పిల్లల్ని మొదటి కేటగిరీలో, 5-18 ఏళ్ల లోపు వారిని రెండో కేటగిరీలో, 18 సంవత్సరాలు పైబడిన వారిని మూడో విభాగంలో చేర్చారు. వీరికి ఇప్పుడు వేర్వేరుగా దరఖాస్తులను రూపొందించారు.
ఆధార్ కార్డును పదేళ్లకోసారి పునరుద్ధరించుకోవాలని సూచిస్తున్నారు అధికారులు. అడ్రస్ స్థానికతను నిర్ధరించుకుంటూ నమోదు చేసుకోవాల్సి ఉంటుందని చెబుతున్నారు. అందుకోసం అవసరమయ్యే అడ్రస్ ప్రూఫ్స్ జత చేయాలి. గతంలో గెజిటెడ్ అధికారి సంతకంతో సదరు వ్యక్తి పేరు, తండ్రి పేరు, అడ్రస్, డేట్ ఆఫ్ బర్త్.. మార్పు చేసుకునే అవకాశం ఉండేది. ఇప్పుడు మాత్రం మున్సిపల్ కమిషనర్, తహశీల్దార్ జారీ చేసే గుర్తింపు పత్రాన్ని చూపాలి. ఓటర్ గుర్తింపు కార్డు, పాస్‌పోర్ట్, బ్యాంక్ పాస్‌బుక్, రేషన్ కార్డులో సరైన అడ్రస్ ఉంటే.. వాటితో సరి చేసుకోవచ్చు. నీటి పన్ను, విద్యుత్, టెలిఫోన్ బిల్స్, గ్యాస్ కనెక్షన్ డాక్యుమెంట్లు కూడా వినియోగించుకోవచ్చు.
పేరులో మార్పు చేయాలంటే..
ఇక పేరులో మార్పు చేయాలంటే మాత్రం తప్పనిసరిగా ఫొటో ఉన్న ధ్రువపత్రాన్ని సమర్పించాలి. 10th క్లాస్ మార్కుల జాబితా (మెమో), పాన్ కార్డు, ఓటర్ గుర్తింపు కార్డు, డ్రైవింగ్ లైసెన్స్, పాస్‌పోర్ట్, ఉపాధి హామీ జాబ్‌కార్డ్ వంటి ధ్రువపత్రాల్లో ఏదో ఒకటి యాడ్ చేయాలి. ఉద్యోగులు వారి గుర్తింపు కార్డు, పెళ్లి అయిన వారైతే వివాహ ధ్రువపత్రం, తహశీల్దారుచే జారీ చేసే కుల ధ్రువపత్రం సమర్పించవచ్చు. ఇదే విధంగా పుట్టిన తేదీ మార్పు, జెండర్ మార్పునకు కూడా రూల్స్ మారాయి.
